தமிழகத்தில் கொரோனா பாதிப்பு கடந்த அக்டோபர் மாதத்தில் இருந்து குறைய தொடங்கியது. தொடர்ந்து குறைந்து வந்த நிலையில் தமிழகத்தில் நாள் ஒன்றுக்கு சராசரியாக 450-க்கும் மேற்பட்டவர்களுக்கு தொற்று உறுதி செய்யப்பட்டு வந்தது. இந்த நிலையில் கடந்த பிப்ரவரி மாதம் இறுதி வாரம் முதல் மீண்டும் தமிழகத்தில் கொரோனா தாக்கம் அதிகரிக்க தொடங்கியது.

அந்த வகையில் நேற்று ஒரே நாளில் மட்டும் 1,779 பேருக்கு கொரோனா தொற்று உறுதி செய்யப்பட்டுள்ளது. மேலும் நேற்று கொரோனா சிகிச்சை பெறுகிறவர்களின் எண்ணிக்கை 10 ஆயிரத்தை கடந்துள்ளது. உயிரிழப்பும் தொடர்ந்து அதிகரித்து வருகிறது. சராசரியாக நாள் ஒன்றுக்கு 10 பேர் கொரோனாவால் உயிரிழந்து வருகின்றனர்.

இந்த நிலையில் தமிழகத்தில் கொரோனா பாதிப்பு 135 சதவீதமாக அதிகரித்துள்ளதாக ஒரு அதிர்ச்சி தகவலை தமிழக பேரிடர் மேலாண்மை ஆணையம் வெளியிட்டுள்ளது. இதுகுறித்து தமிழக பேரிடர் மேலாண்மை ஆணையம் டுவிட்டர் பதிவில் கூறப்பட்டிருப்பதாவது:-

தமிழகத்தில் கடந்த 13-ந்தேதி 695 பேருக்கு புதிதாக கொரோனா நோய்த் தொற்று கண்டறியப்பட்டது. கடந்த 24-ந்தேதி, 1,636 பேருக்கு புதிதாக கொரோனா நோய் தொற்று கண்டறியப்பட்டது. இந்த 12 நாட்களில் 135 சதவீதம் கொரோனா தொற்று உயர்ந்துள்ளது.