பஹல்காம் தாக்குதலுக்கு பதிலடியாக “ஆபரேஷன் சிந்தூர்” மூலம் பாகிஸ்தானில் உள்ள பயங்கரவாத முகாம்களை இந்தியா தாக்கியது. வெளியுறவுச் செயலாளர், ராணுவ அதிகாரிகள் விளக்கம்.
வினைவலியும் தன்வலியும் மாற்றான் வலியும்
துணைவலியும் தூக்கிச் செயல்.
(குறள்: 471)ஜம்மு காஷ்மீரின் பஹல்காம் பகுதியில் ஏப்ரல் 22 அன்று இந்திய சுற்றுலாப் பயணிகள் மீது நடத்தப்பட்ட காட்டுமிராண்டித்தனமான பயங்கரவாதத் தாக்குதலுக்கு பதிலடியாக, இந்திய ஆயுதப் படைகள் இன்று (மே 07, 2025) அதிகாலை பாகிஸ்தான் மற்றும் பாகிஸ்தான் ஆக்கிரமிப்பு காஷ்மீரில் உள்ள ஒன்பது பயங்கரவாத உள்கட்டமைப்புகள் மீது “ஆபரேஷன் சிந்தூர்” என்ற பெயரில் துல்லியமான தாக்குதல்களை நடத்தியுள்ளன. இந்தத் தாக்குதலில் 70க்கும் மேற்பட்ட பயங்கரவாதிகள் கொல்லப்பட்டதாகவும், 60க்கும் மேற்பட்டோர் காயமடைந்ததாகவும் தகவல்கள் தெரிவிக்கின்றன.
பஹல்காம் தாக்குதலில் 26 இந்தியர்கள் கொல்லப்பட்டனர். இந்த கொடூர தாக்குதலை லஷ்கர்-இ-தொய்பாவுடன் தொடர்புடைய “தி ரெசிஸ்டன்ஸ் ஃபிரன்ட்” (TRF) என்ற அமைப்பு பொறுப்பேற்றுள்ளது.
வெளியுறவுச் செயலாளர் விக்ரம் மிஸ்ரி அறிக்கை:
இன்று புது தில்லியில் நடைபெற்ற செய்தியாளர் சந்திப்பில் பேசிய இந்திய வெளியுறவுச் செயலாளர் திரு. விக்ரம் மிஸ்ரி, பஹல்காம் தாக்குதலுக்கு பாகிஸ்தானே காரணம் என்றும், பயங்கரவாத உள்கட்டமைப்புகள் மீது நடவடிக்கை எடுக்க பாகிஸ்தான் தவறியதால் இந்தியா இந்த நடவடிக்கையை எடுக்க வேண்டிய கட்டாயம் ஏற்பட்டதாகவும் தெரிவித்தார். “பஹல்காம் தாக்குதலின் விசாரணையில் பயங்கரவாதிகளுக்கும் பாகிஸ்தானுக்கும் இடையே தொடர்பு இருப்பது தெளிவாகியுள்ளது. TRF அமைப்பு லஷ்கர்-இ-தொய்பாவின் பினாமி அமைப்பு என்பதும், இதற்கு பாகிஸ்தான் முழு ஆதரவு அளிப்பதும் தெரியவந்துள்ளது,” என்று அவர் கூறினார்.
மேலும், ஜம்மு காஷ்மீரில் இயல்புநிலை திரும்புவதையும், குறிப்பாக சுற்றுலாத்துறையின் வளர்ச்சியையும் சீர்குலைக்கும் நோக்கில் இந்தத் தாக்குதல் நடத்தப்பட்டதாக திரு. மிஸ்ரி குறிப்பிட்டார். “இந்தியா தனது தற்காப்பு உரிமையை நிலைநாட்டியுள்ளது. பயங்கரவாத உள்கட்டமைப்புகளை தகர்ப்பதே எங்களின் நோக்கம்,” என்றும் அவர் திட்டவட்டமாகத் தெரிவித்தார். இந்த நடவடிக்கை நிதானமானது, விரிவாக்கமற்றது, விகிதாசாரமானது மற்றும் பொறுப்பானது என்றும் அவர் கூறினார்.
கேணல் சோபியா குரேஷி மற்றும் விங் கமாண்டர் வயோமிகா சிங் விளக்கம்:
இந்த செய்தியாளர் சந்திப்பில் இந்திய ராணுவத்தின் சார்பில் கேணல் சோபியா குரேஷி மற்றும் இந்திய விமானப்படையின் சார்பில் விங் கமாண்டர் வயோமிகா சிங் ஆகியோரும் கலந்துகொண்டு “ஆபரேஷன் சிந்தூர்” குறித்த விவரங்களை பகிர்ந்து கொண்டனர்.
கேணல் சோபியா குரேஷி பேசுகையில், “ஆபரேஷன் சிந்தூர் பஹல்காம் பயங்கரவாதத் தாக்குதலில் பாதிக்கப்பட்டவர்களுக்கு நீதி வழங்கும் நோக்கில் தொடங்கப்பட்டது. நம்பகமான உளவுத்துறையின் அடிப்படையில் ஒன்பது பயங்கரவாத முகாம்கள் குறிவைக்கப்பட்டு அழிக்கப்பட்டன. பாகிஸ்தான் ராணுவ நிலைகள் எதுவும் தாக்கப்படவில்லை,” என்று தெரிவித்தார். பயங்கரவாத குழுக்களான லஷ்கர்-இ-தொய்பா, ஜெய்ஷ்-இ-முகம்மது மற்றும் ஹிஸ்புல் முஜாஹிதீன் தொடர்புடைய முகாம்கள் தாக்கப்பட்டதாகவும் அவர் குறிப்பிட்டார்.
விங் கமாண்டர் வயோமிகா சிங் கூறுகையில், “இந்தியா தனது பதிலடியில் குறிப்பிடத்தக்க நிதானத்தை வெளிப்படுத்தியுள்ளது. பஹல்காம் தாக்குதலில் பாதிக்கப்பட்டவர்களுக்கும் அவர்களது குடும்பத்தினருக்கும் நீதி வழங்குவதற்காக இந்த நடவடிக்கை மேற்கொள்ளப்பட்டது. குறிவைக்கப்பட்ட அனைத்து இடங்களும் பொதுமக்களுக்கு பாதிப்பு ஏற்படாதவாறு கவனமாக தேர்ந்தெடுக்கப்பட்டன,” என்றார். இந்திய ஆயுதப்படைகள் எந்தவொரு தவறான சாகசத்திற்கும் பதிலடி கொடுக்க முழுமையாக தயாராக இருப்பதாகவும் அவர் எச்சரித்தார்.
“ஆபரேஷன் சிந்தூர்” என்ற பெயர், பயங்கரவாதத் தாக்குதலில் தங்கள் கணவர்களை இழந்த பெண்களுக்கு அஞ்சலி செலுத்தும் வகையில் சூட்டப்பட்டுள்ளதாக தெரிவிக்கப்பட்டது. இந்த நடவடிக்கை, பயங்கரவாதத்திற்கு எதிராக இந்தியா உறுதியான நடவடிக்கை எடுக்கும் என்பதை மீண்டும் ஒருமுறை உலகிற்கு உணர்த்தியுள்ளது. சீனா மற்றும் ஐக்கிய நாடுகள் சபை பொதுச்செயலாளர் ஆகியோர் இந்த மோதல்கள் குறித்து கவலை தெரிவித்துள்ளனர்.
